I
skrivande stund er Mannen endå ikkje rast ut. Skjer det ikkje snart, ebbar
mediamerksemda ut. Men for eit køyr det har vore. I fleire veker har landets
auge vore på Rauma og Romsdal. Det er ikkje kvardagskost. La gå, MFK har vunne
Eliteserien. Men det er eit langt stykke igjen før småborgarlege Molde med sitt
oppblåste sjølvbilete blir representativ for Romsdalen. At det ein gong var
pressekonferanse på Åndalsnes ( ! ) blir derfor ei god soge til barnebarna, helst
trur dei det er ei skrøne.
I førre veke kunne Rauma-ordførar Lars
Olav Hustad ( H ) opplyse om Mannen var omdøypt til «Seigmannen». Vi skjøner. Det tek tid før raset kjem.
Ha-ha. Flåsete, men kven kan halde det mot han, i slik ein mediastorm? Tenk om
fjellet ikkje rasar før reporterane er trygt tilbake i Oslo igjen, kva då med
Rauma-reklama? Det kan likevel ikkje stå uimotsagt. Mannen er då vittarleg
romsdaling god som nokon. Og kva er ein romsdaling, om ikkje tung, treg og
tagal? Dei tre store t’ane? Det er jo sjølve definisjonen, meir, det er eit
heidersteikn. Slik har det blitt gjennom generasjonane, av slitet på attlega
eller sjøen. Og i fjellskuggen. Ein blir ikkje kvikk og taletrengt under det
mørke, massive, ruvande. Ein strebar ikkje etter merksemd og makt, når ein dagleg
ser kor liten ein sjølv er ( men så blir ein heller ikkje gniten, som dei sør
for fylkesgrensa ). Ein ekte romsdaling snakkar og handlar ikkje før han
absolutt må. Kjære ordførar Hustad. Du er heilt klårt ikkje innfødd. Kanskje kjem
du frå Austlandet. Nord-Noreg? Eller til og med Sunnmøre? I Amerika, som mange
romsdalingar har utvandra til, er det slik at politikerane må kjenne veljerane
sine, skal dei ha sjanse til å bli velt. Dei må forstå tenke- og veremåten
deira på grunnleggande nivå, trass i, eller særleg viss, dei kjem utanfrå. Slik
er det ikkje her, dessverre, må ein seie, når kven som helst tydelegvis kan
hekte på seg ordførarkjedet. Men alt har si grense. Ordførar Hustad: Du må vær
så god sette deg på skulebenken, som ein seier – og det er ikkje positivt
meint, trass i samtidas ekstremfokus på kursing - du må lære deg meir om dei du
er sett til å styre. Historie, tradisjonar, talemåtar ( eller mangel på slike
). Mannen dett ikkje før han er klar. Det kan det derimot godt vere at du gjer,
om du fortsett som du stemnar.
Ingen kommentarer:
Legg inn en kommentar